فتوى شيخي المجروح بقلم الشاعر أحمد أخضري
=============
بقلم الشاعر أحمد أخضري
نويتْ نصومْ على غرامكْ بعدْ اليومْ ** واسْتفْتيْت اسيادنا في المسالا.
جاوبني فقيهْ يعرفْ ذا العلـــــــــومْ ** ومجرّبْ قبلي الفتوَى رجــــــــــالا.
قالْ :صيامكْ راهْ باطلْ يا مضيـُــومْ ** بعدنْ ثبتتْ شوفْتكْ للختّــــــــــالا.
ياشيخي من حبْها راني مهـــزومْ ** شوفْ كتابكْ كاشْ رُقيَه للحــــالا.
درْكمْ شيخِي نظنْ فالطالبْ مغروم** دمعةْ عينُو فوقْ خدّو سيّــــــــالا.
ياشاعرْ وعلاهْ نبّشتْ المـــــردومْ ** ناوِي ننسى جيتْ للجرحْ قبــــالا.
قالْ سْوالكْ راهْ ذكّرني بهمـــــومْ ** دامِي جوفي فيهْ نارُو شعــــــــالا.
فسّدْ صحْوِي خطْ برواقاتْ غيُــومْ ** ضهبْ مغيثرْ دارْ عنّي ظـُــــــــلالا.
هجرتْ الراحَه والعيونْ هجرْها نومْ** وفي العلْفَه مانيشْ وسطْ الخيالا.
تعذرْني نبكِي حوالي بالمنظـومْ ** واسمحولي يا الناسْ الفُــــضالا.
ظالمْ في دينِي وفي حُبِي مظلومْ** نرجى لُطفكْ يالموْلى تعـــــالى.
نحفظْ في القرآنْ حزب من المختومْ ** يحضرْ لِي خيالها في البسمالا.
ننوِي في الصلاةْ نتوضا ونْقُـــومْ ** تشطنِي منها العينْ القتّــــــــــالا.
نسْتغفرْ ربِي نصلِّي عالمعصُومْ ** وفي التسبيحْ يكونْ لسماها دالا.
عظّمتْ الله كانْ تلْمحتْ الموشومْ** ولا ضحكتْ بانْ جوهرْ يتــــــلالا.
خدّ الغنجَه كِي الوردْ اللِي مشمومْ** حاجبْ فوقْ العينْ مخطوطْ رسالا.
وذاكْ الفمْ تقولْ بالريشَه مرسُومْ ** محنَه جاتْ تقولْ للتّوْبَه لالا .
نسيتْ اهلي ورْفاقتِي ونسيتْ القومْ ** نسيتْ اللِي حطُّو نسيتْ الرحالا.
نسيتْ الوقتْ نسيتْ واشْ من يومْ اليومْ ** نسيتْ العدّ نسيتْ نفسي دهكالا
نسيتْ الكتبَه نسيتْ كلْ حروفْ علُومْ** نسيتْ القُلمْ نسيتْ خطّ المقالا
نسيتْ أنا الامامْ ولا أنا مأمومْ ** نسيتْ القبْلَه من محاينْ خبّــــالا.
يا ضيْمِي حالِي بحالْ اللِي مفطومْ **يبكِي صدرْ ميْمتُو في تهوالا.
ياشوْمي ناجيتْ نبكِي لكْ بهمومْ ** زدتْ همومِي زادْ غزْلِي تخبالا.
تمنيْتكْ تقرا الفتحْ على الملطومْ ** جبتْ الواقِعَه وزدتْ الزلـــزالا.
انْساني ياشيخْ حتى نا ماليومْ ** خلِّي بيني وبينْ زينْ التخمالا.
